Te Rangahau e pā ana ki te Pāhekoheko ki te Marea: Te Wāhanga 2

Overview

Nau mai, haere mai.

Nau mai ki te Wāhanga 2 o te tukanga Panoni i te Hōtaka NCEA

Kua tae tātou ki te wā e rite nei te hukihuki o ngā marau i te Taumata 1 o NCEA kia arotakehia e koe.

Mā ō māramatanga me ō whakaaro mātou e āwhina ki te whakapai ake i ēnei rawa e rite ai kia whakamātauhia e ngā kura matakahi ā te tau 2022.

Te tukanga whakawhanake i te Taumata 1

I a koe e mahi tahi mai ana, me mahara ki tā mātou whāinga kia tautoko ā tātou marau o te Taumata 1 i te oranga, i te tōkeke, i te hononga pai o ngā kaupapa, i ngā ara me te pono – mā ngā ākonga, mā ngā kaiako anō hoki

Te huarahi kia mahi tahi mai/whai wāhi mai

Kua whakaritea te rangahau e pai ai tō:

• tuku i tētahi urupare whānui mō tētahi marau
• tuku i tētahi urupare taipitopito mō tētahi marau me ōna rawa whāiti
• tiaki me te kati i te rangahau, ka hoki mai ai ā tē wā kua rite koe.

He pārongo atu anō

E aha ana mātou?

E hiahia ana mātou ki te pāhekoheko ki te whānui o ngā tāngata takitahi me ngā rōpū e pā ana ki te wāhanga tuarua o te whanaketanga o ngā marau o te Taumata 1 o NCEA i te Arotakenga o ngā Paerewa Paetae. I arotahi tēnei wāhanga o te whanaketanga ki te arotakenga o ngā rawa o te Wāhanga 1 i runga i ngā urupare me te whanaketanga o ngā Paerewa Paetae me ētahi atu rawa aromatawai.

Ka whakamātauhia ēnei rawa i te wā o te whakamātau e kitea ai te āhua o te whaihua i te whakamahinga, kātahi ka rere ōna whakatikahanga me ōna whakawhanaketanga whakamutunga. Ka whakamahia ō urupare e mārama ake ai mātou ki ngā mea e pai ana, ki ngā mea hoki me paku whakatika e rite ai ngā rawa kia whakamātauhia e ngā kura matakahi.

Te huarahi hei whakautu i tēnei rangahau

Ko te roa o te whakatutuki i tēnei rangahau kei te āhua o te roa o tō arotake i ngā rawa, o te nui hoki o ngā wāhanga me ngā pātai ka kōwhiria e koe hei whakautu māu. E āhei ana tō tiaki, tō kati hoki i te rangahau, ahakoa te wā, ka hoki mai ai ā tōna wā, engari kāore ō whakautu e whakawhiwhia mai kia pāwhiria rā anōtia e koe te “end and submit”.

Pānuitia ngā tuhinga hukihuki mō te marau i NCEA.Education.govt.nz (e kitea ai he tohutohu atu anō e pai ai te whai haere i te pae tukutuku, me pāwhiri ki konei). Mehemea i whai wāhi koe ki te rangahau mō ngā rawa hukihuki o te Wāhanga 1, ka kite koe i te whakahoutanga o ngā tuhinga o te Wāhanga 1, ka mutu, kua āpitihia he taipitopito anō, he rawa hou hoki kāore anō kia kitea e koe. Kua whakarārangitia ērā ki raro nei.

Pāwhiria te ripa e kīia nei ko Subjects, kei te pito whakarunga i te taha mauī o te mata, ka kōwhiria ai te/ngā marau e hiahia nei koe ki te arotake. Kei ia whārangi marau ngā ripa e whā:

Kei te ripa e kīia nei ko LEARNING, ko ēnei:

• Te Tukutuku Ako mō te Marau e whakaatu ana i ngā Akoranga Tāpua mō te marau.
• He pārongo atu anō e whakamārama ana i te huarahi i whakawhanakehia ai te Tukutuku Ako me ngā Paerewa Paetae, he pārongo, he tohutohu atu anō hoki e pā ana ki te ako i te marau.

Kei te ripa e kīia nei ko TEACHING, ko ēnei:

• Ngā Hōtaka Ako (e 3 i te nuinga o ngā marau) hei whakaatu i te huarahi hei whakamahi pea i te Tukutuku Ako e hangā ai tētahi hōtaka ako e kotahi-tau nei te roa, e raupapa ana, ka mutu, ka whai wāhi ko ngā ara aromatawai ka wātea pea i ngā Paerewa e whā. He tohutohu pea ēnei e whakaatu ana i te huarahi e whakawhanakehia ai pea tētahi hōtaka ako mō tētahi tau te roa.

Kei te ripa e kīia nei ko ASSESSMENT, ko ēnei:

• Ngā Paerewa Paetae e whakaatu ana i ngā Akoranga Tāpua ka aromatawaihia. E whā kua whakaritea mō ia marau, arā, e rua ngā mea ā-roto, e rua ngā mea ā-waho. Kua tāpaetia hoki ko ngā Āhuatanga o te Aromatawai mō ngā aromatawai ā-roto.
• Ngā Ngohe o te Aromatawai ā-Roto e whakaatu ana i te horopaki o ngā Paerewa ā-roto, e whakatauira ana hoki i te huarahi hei aromatawai pea i aua Paerewa rā. Ka whai wāhi atu ki ēnei ko ngā Tohu Paetae, ā, ka whai wāhi atu pea ētahi atu rauemi me ētahi atu tohutohu hei ārahi i te kaiako.

Kei te ripa e kīia nei ko GLOSSARY  ko ēnei:

• Ngā tautuhinga o ētahi kupu, o ētahi kīanga rānei e tauhou ana pea, e whāiti ana rānei ki te marau

Te Mana Ōrite mō te Mātauranga Māori

E noho matua rawa atu ana te whakaūnga o te mana ōrite o te mātauranga Māori ki te angitu o te Mōkī Panoni i a NCEA. Ko tētahi wāhanga o tēnei rangahau, ko te tonoa ōu kia tukuna mai he urupare e pā ana ki te āhua o tā ēnei rawa tautoko i tēnei whāinga matua.

Te wātea o te toronga me te whai wāhitanga

E whaihua ana ēnei rawa ki ngā ākonga katoa?

• Te pāhekohekotanga: Mā ngā rawa nei e whai wāhi ai te reo, te ahurea me te tuakiri o te ākonga ki te aromatawai.
• Te wātea ki te toro me te māramatanga: I te nuinga o te wā, e mārama pū ana te reo, otirā, kāore e rangirua ana. 
• Te whakaatanga: Ka kite te ākonga i te wāhi ki a ia i te aromatawai, ka mutu, ka angitu ia i runga i tōna anō momo.
• Te mahi me te whakapuakanga: E mārama ana ngā mahi hei mahinga i te aromatawai, te huarahi hoki e tutuki ai.

Te tiaki i ō pārongo

E kore ngā pārongo i homai ai e whakamahia mō take kē atu i ērā kua tuhia i runga ake nei, ka mutu, kāore ngā pārongo e tukuna ki tangata kē rānei, ki whakahaere kē rānei. Kaua koa e homai he pārongo whaiaro i ō urupare kia kore ai ō urupare e tautohua.

Ko ngā tukunga mai, tae atu ki ngā ingoa me ngā tuhinga e hāngai ana ki te tukanga kōrero whānui, ka herea pea ki te tono i raro i te Official Information Act 1982. Ina pērā, ka āta whakaarohia te tika rānei o te pupuri pārongo e ai ki te Ture (hei tauira, i ngā wā me mātua pērā hei tiaki i te matatapu o te tangata).

Ka whakaritea tētahi urupare ki te kohinga urupare mā roto i te pae tukutuku mō NCEA.

Tēnā koe i tō whakapau wā ki te whakautu i tēnei rangahau.

Ngā tohutohu

Te huarahi e marohitia ana hei whai:

1. Pānuitia te katoa o ngā tuhinga mō te marau kei NCEA.Education.govt.nz i mua i tō whakautu i ngā pātai e kite ai koe i te whānuitanga o ngā kōrero.
2. Waiho kia tuwhera ana a NCEA.Education.govt.nz te mata o tō pūrere hei tirohanga māu ka whakautua ana he pātai.

Ngā raraunga whānui/te aroturuki pātai o te rangahau

Pātaihia ai e mātou ēnei pātai e whakatōpūhia ai ngā urupare e mārama ai mātou ki ngā tirohanga kē a te whānuitanga o ngā tāngata ka whakautu mai i tēnei rangahau.